CEBU, Philippines - Dili lang duha ka tawo ang posibleng nalambigit sa pagpatay kang Karen Kaye Montebon, ang 17 anyos nga dalaga nga gipatay sulod sa ilang panimalay didto sa Corinthians Subdivision sa dakbayan sa Lapu-Lapu.
Kahinumduman nga mihimo og hot pursuit operation ang kapulisan sa dakbayan niadtong adlaw’ng Huwebes batok niadtong duha ka tawo nga gitumbok sa texter nga posibleng may kalambigitan sa krimen.
Apan nakaikyas ang duha, ug ang usa nakalarga padung sa Bohol samtang ang usa kataposang nasigpatan sa Consolacion apan wala ‘sab maabti.
Nakuha sa kapulisan ang maong impormasyon labot sa pagsibat sa usa didto sa Bohol human kini mipadala og mensahe sa iyang pag-umangkon nga naabot na kini sa Bohol ug dili magsaba kun hain siya kun adunay mangita niya. Si Senior Superintendent Armando Radoc, OIC sa Lapu-Lapu City Police Office mibutyag nga ilaha nang nakahinabi ang maong babaye didto sa Bohol ug nagkasabot nga mopatim-aw kini sa LCPO aron malimpyohan iyang pangalan.
Wala hinuon gisalikway sa kapulisan ang posibilidad nga kadtong nagpadala og mensahe kanila posibleng nanglawgaw sa imbestigasyon.
Si Lapu-Lapu City Mayor Paz Radaza mipagawas og memorandum ngadto sa tanang barangay kapitan ug sa tanang homeowners associations higpitan ilang seguridad.
Si Thelma Chiong, pangulo sa Crusade Against Violence (CAV) sa iyang bahin mikondenar sa nahitabo kang Kaye maong subli siyang nanawagan ibalik ang death penalty sa mga nakahimo og heineous crimes. Gisaway niya ang kapolisan nga maayo lang kun adunay international events sa Sugbo.
Sa laing bahin, mohimo og linaing imbestigasyon ang National Bureau of Investigation- 7 sa maong hitabo sumala pa ni Assistant Regional Director Eric Isidoro.
Matud pa niini midangop sa ilang buhatan ang amahan sa biktima nga si James Montebon aron masulbad ang kaso ug mahatagan og hustisya ang kamatayon sa anak.
Tungod sa mga nahitabong krimen sa nagkadaiyang mga subdivisions dinhi sa Sugbo, gustong pakigkitaan ni Cebu City Vice Mayor Edgardo Labella ang mga kadagkoan sa Philippine Association of Detective and Protective Agency Operator, Inc (PADPAO) aron sutaon kun unsay ilang mga lakang nga gibuhat kabahin niini. (Decemay Padilla, Rowena Capistrano, Renan Alangilan ug Sheriza Mae Uy/EIM)(BANAT NEWS)