One-way sa Mandaue kutob sunod semana

CEBU, Philippines - Kutob na lang sunod semana ang gipatuman nga one-way traffic scheme sa dakbayan sa Mandaue diin mapupos na ang 60 ka adlaw nga pagtuon.

Matud ni  Glenn Antigua, executive operation officer sa Traffic Enforcement Agency of Mandaue (TEAM), nga human sa 60 ka adlaw nga dry-run, moumol og rekomendasyon ang Traffic Board nga iduso sa buhatan ni Konsehl Elstone Dabon, ang chairman sa committee on transportation sa konseho sa dakbayan alang sa sunod nga lakang nga mahapsay ang trapiko.

Gitataw ni Antigua nga ang mga magpapatigayon sa dakbayan nisuporta  sa gipatuman nga one-way traffic scheme tungod kay nakapaluag kini sa dalan.

Gipatuman ang one-way traffic scheme sa dalan Sotero Cabahug paingon sa Ibabao-Estancia ug P. Burgos sa Alang-Alang.

Matud ni Antigua nga sa una’ng mga adlaw sa pagpatuman nakadawat sila og mga reklamo sanglit nabag-ohan man ang mga pasahero ug mga drayber sa jeepney hinungdan nga ang pipila dili molahos sa mga rota.

“Anha ra man kutob sa gasolinahan sa karaang merkado ang mga PUJ, magkabuang na hinuon mi og pangita og PUJ nga kasakyan kay dili man manglahos ang mga drayber sa ilang pagbiyahe,” sumala pa ni Shanen Samonte, pasahero nga taga Ibabao, Estancia.

Ang mga drayber niingon nga  layo na ang rota kutob na lang sila sa karaang merkado.

Si Antigua niingon nga higpit karon nga nagbantay ang ila’ng traffic enforcers sa mga eskina sa mga dalan aron dakpon kadto’ng mga PUJ nga moliko sa rota.

Multa nga P200 ang ipahamtang sa masakpan.

 “Ang P200 mao lang gyud ang multa nga mabayran sa madakpan nga mga drayber sa citation ticket,” matud ni Antigua.

“Mao bitaw nga magpatabang mi usahay sa taga LTO kay maayo to kay TOP man ang i-isyu sa madakpan nga mga drayber ug modaku-daku na gyud ang ila’ng multa,” dugang ni Antigua. (BANAT NEWS)