CEBU, Philippines - Hayan mahatagan na og hustisya ang nahitabo sa 17-anyos nga si Karen Kaye Montebon, nga gipatay sulod mismo sa ilang panimalay sa Corinthians Subdivision, Barangay Suba-Masulog, Dakbayan sa Lapu-Lapu tungod sa nag-abot-abot nga impormasyon nga gituohang may koneksyon sa iyang kamatayon.
Kini samtang si Lapu-Lapu City Mayor Paz Radaza mipahibalo nga mohatag ang siyudad og tunga sa milyon ka pesos nga ganti alang niadtong makahatag og impormasyon aron madakpan ang mga mamumuno sa tinun-an.
Apan sa gihimong hot pursuit kagahapon sa kapolisan sa Lapu-Lapu giingong nakaikyas ang mga mamumuno nga ilaha nang nailhan apan wa ibutyag tungod sa kabalakang mabulabog ang operasyon.
Matud ni Senior Superintendent Armando Radoc, hepe sa Lapu-Lapu City Police Office mibutyag nga adunay giumol nga “Karen Special Investigation Task Team” nga motutok sa kaso.
Kini gilangkuban sa Investigation Detective Management Branch, Criminal Intelligence Branch, Homicide Section, Police Station 4, Scene of the Crime Operation ug moabag usab ang Criminal Investigation and Detective Group-7.
Gipaningkamotan karon sa kapolisan nga marekober ang camera ug ipad nga maoy gituohang tuyo sa mga kriminal.
Tulo ka saksi ang nakuha sa kapulisan nga maoy ilang gikuhaan og basehan sa suspek tungod kay ang usa sa mga saksi mipadala og mensahe kang Radoc niadtong Miyerkules sa gabii nga matud pa dili na maagwanta sa iyang konsensiya ang nahitabo kang Montebon.
Personal nga motibo ang rason nganong gipatay ang 17-anyos kay matud pa dunay nahitabong panaglalis ang biktima ug suspek.
“Base on the initial report, mao nay atong gibasehan which is now leading to the identity, aduna lay heated argument ang suspect ug victim, as to when, where, and to the particulars of the argument we do not know,” matud ni Radoc.
Wala usab gisalikway ni Radoc nga kadtong nakit-an sa mga silingan sa biktima nga babaye ug lalake nga sakay sa motorsiklo posibleng dunay kalambigitan sa hitabo.
Ang PNP Crime Laboratory mipagawas na sa resulta sa autopsy sa patay’ng lawas ni Montebon ug dako ang posibilidad nga wala kini lugosa.
Samtang ang amahan sa biktima nga si James Montebon, kinsa nahinabi sa Banat News miingon mapasalamaton siya sa dali nga pag-aksyon sa kapulisan aron madakpan ang suspek ug mahatagan og hustisya ang iyang anak.
Nagpasalamat usab kini sa mga tawo nga misimpatiya ug mipadayag sa ilang suporta sa ilang pamilya.
“Kami sa akong pamilya ug kauban sa Simbahan, nagpasalamat mi nga nihatag gyud sila og pagpakabana ug” suporta sa akong anak,’ sigon pa niya. (BANAT NEWS)