CEBU, Philippines – Ang grupo sa Liberal Party (LP) sa probinsiya niining semanaha gikatakdang magsugod na og pahigayon og mga meeting alang sa eleksiyon sa sunod tuig.
Si Bise Gobernador Agnes Magpale sa Bakud Party nga kaalyado sa LP mibutyag nga karong semanaha gikatakdang magsugod na ang mga meeting sa LP alang sa eleksiyon sunod tuig.
Matud niya nga ang LP duna na kini mga kandidato sa ika-pito unya nga distrito nga sila si Jerome Librando kinsa bise mayor sa lungsod sa Barili ug si Bokal Christopher Baricuatro.
Ubos sa House Bill No. 4427 alang sa 7th district maggama kini og tulo ka posisyon nga langkuban sa kongresista ug duha ka posisyon sa hunta probinsiyal.
Samtang sa ikaduhang distrito si Mayor Raymond Calderon sa lungsod sa Samboan maoy usa sa ilang kandidato. Matud usab ni Magpale nga gitugyan ni Gobernador Hilario Davide, III sa district chairman sa ikaduhang distrito nga si Kongresista Wilfredo Caminero ang kabahin sa mga kandidato sa nahisgutang distrito nga alyado sa LP.
Gibutyag ni Magpale nga ang LP sa probinsiya duna na kini gipahigayong sunod-sunod nga konsultasyon sa ilang mga kaalyado diin sa milabay’ng semana ang mga kaalyado nila sa lungsod sa Badian ilang gi-meeting. Apan ang LP wala pa gyud kini mopagawas og mga listahan sa ilang mga kandidato alang sa eleksiyon sa sunod tuig.
Dugang niini, ang LP naghan-ay pa usab sa ilang mga kaalyado nga mokandidato. – /EIM) (BANAT NEWS)