2-anyos patay sa kulata

CEBU, Philippines – Usa ka 2-anyos nga batang babaye ang namatay human matud pa gikulata sa iyang ama-ama kagahapon sa kaadlawon diha sa sitio Panaghiusa 1, barangay Tunghaan, lungsod sa Minglanilla.

Base sa pasiunang paghiling sa mga imbestigador, nangatangtang ang ngipon, naharos ang baba, nanglagom ang nawong, ulo ug ubang parte sa lawas ni Ritsanlyn Donaire.

Gitanggong karon ang iyang ama-ama nga si Nicodemo Deloy ,30, nga usa ka construction worker  lakip ang iyang inahan nga si Ailen Donaire, 25, tungod sa pagtabon niini sa kapuyo.

Si Police Officer 3 Hazel Tuazon, hepe sa Womens and Children Protection Desk (WCPD) sa Minglanilla Police Station nagkanayon nga nabulabog ang mga residente sa lugar mga alas 9:00 sa buntag human ang mga suspetsado nagdali  pagkuha sa death certificate sa bata.

Ang mga silingan ang nagduda tungod kay himsog pa man ang bata nga ilang nakita ug  nakugang siya dihang gisultihan silang pneumonia ang gikamatyan niini. Apan misamot ang ilang pagduda human makakita sa hitsura sa bata nga pwerteng bun-oga. Ang silingan sa mga Donaire nga si Rosauro Pasumala, 30, maoy mitawag sa kapulisan aron kini masusi ang kamatayon sa bata.

Matud pa ni PO3 Tuazon dali silang miadto sa gipuy-an sa bata ug didto ilang nakita ang grabeng bun-og sa inosenteng bata.

Ang inahan mitug-an sa mga otoridad nga nasakit sa pneumonia ang iyang anak sud na sa duha ka adlaw apan ang mga tinugyanan sa balaud ang nagduda gumikan sa bun-og sa bata nga ilang nakita.

"Hasta gani ang mga silingan wala motuo sa mga suspeks kay magsige man diay ni sila kadungog nga magsiyagit ang bata gumikan sa pagpangdagmal," nagkanayon si Tuazon nga nahinabi sa Banat News. Ang duha ka mga suspek wa dayon mohatag og impormasyon bahin sa kamatayon sa bata apan dangtan og pila ka oras, si Aileen miangkon sa  mga polis nga gidapatan sa iyang kapuyo ang iyang anak kay nakasuyop kini niadtong tungora.

Matud niya nahadlok lang siya motug-an dayon kay madapatan siya sa kapuyo. Si Tuazon mibutyag nga aduna usab silay testigo nga bata nga nakakita giunsa pagparok sa ama-ama ang bata diha sa bungbong ug gisumbag sa tiyan hangtud nalup-og ug nakuyapan.

Nabaniog na sa ilang lugar ang ama-ama ug ang inahan sa bata nga mogamitay og ilegal nga drugas.

Ang hepe sa Minglanilla Police Station nga si Chief Inspector Richard Gadingan nagkanayon nga ilang ipaubos sa otopsiya ang lawas sa bata aron mapalig-on ang kaso nga ilang ipasaka sa duha.

Ang barangay kapitan sa Tunghaan nga si James Getuaban, nibutyag sa Banat News nga niduol pa kaniya ang ama-ama sa bata kay nangayo og tabang aron mapalubong ang bata.

Iya kining gitudloan kun unsay buhaton aron kini mapahiluna, sama sa pagduol sa health center aron masuta ang kamatayon sa bata, apan human niya kini nasultihan nagkarakara paglakaw ang ama-ama apan adunay nakahunghong kaniya bahin sa nahitabo sa bata. Kini maoy hinungdan nga iyang gipasugoan ang doktor nga susihon kung unsay tinuoray nga namatyan sa bata ug didto nakita nga pwerteng daghana og lagom sa lawas niini.

Gibutyag sa kapitan nga miangkon kaniya diha sa karsel ang ama-ama nga nadapatan niini ang bata tungod sa iyang kapungot kay saba kini kaayo kay adunay gipamati sa lawas ang biktima.

Si Getuaban, nipadayag nga walay kaso si Deloy sa iyang barangay, apan duna siyay nadawat nga taho nga mogamitay usab kini og ginadili nga drugas. – /EIM) (BANAT NEWS)