Nadasmagan ni konsehal Osmeña kritikal

CEBU, Philippines - Anaa pa sa kritikal nga kahimtang ang usa ka magtutudlo sa Banilad Elementary School human kini madam-agi sa sakyanan sa Cebu City Hall nga giisyu ngadto ni Konsehal Richie Osmeña.

Ang magtutudlo nga si John Rey Sanchez, 39-anyos nga taga Barangay Bacayan, milabang na unta sa Governor Mariano Cuenco Avenue duol sa barangay Sports Complex kaniadtong Biyernes sa gabii diha nga nadasmagan sa Innova nga sakyanan.

Ang biktima una nga gidala sa duol nga Gullas Medical Center apan gibalhin sa Chong Hua Hospital tungod kay nakasinati og samad sa iyang ulo tungod sa pagkalamba sa karsada.

Si Konsehal Osmeña miingon nga ang iyang drayber nga si Ronald Badajos wala dayon makabantay ni Sanchez nga milabang sa karsada mao nga iya kini nga nadam-agan.

Matud ni Osmeña nga gikan sila sa Mactan Airport tungod kay adunay butang nga ilang gipik-ap ug nagpaingon na unta nga mopauli diha nga nahitabo ang aksidente.

Adunay mga nakakita nga kauban nga sakay sa sakyanan sa City Hall ang anak sa konsehal. Nagpasalamat si Konsehal Richie Osmeña nga si Konsehal Margarita “Margot” Osmeña mitabang ug maoy mibutang dayon og P30 mil nga downpayment sa ospital aron nga ang biktima mabutang sa Intensive Care Unit (ICU).

Si Konsehal Richie Osmeña miingon gipasaligan na siya ni City Administrator Lucelle Mercado nga ang biktima maka-avail gayud sa P25 mil nga hinabang gikan sa dakbayan.

Matud ni Osmeña nga personal usab niya tabangan ang panginahanglan sa mao nga magtutudlo sa ospital. Hangtud kagahapon sa udto, miabot na og kapin sa P100 mil ang bayranan niini sa tambalanan. (BANAT NEWS)