CEBU, Philippines – Nadakpan ang katorse ka mga tripulante sa usa ka fishing vessel tungod sa ilegal nga pagpangisda sa kadagatan sa munisipyo sa lungsod sa Sibonga kagahapon sa buntag.
Ang mga mangingisda nga nadakpan mao sila si Julito Almacen, 47-anyos, kapitan sa panagatan; Romeo Remarka, 53, chief engineer; Presillano Remarka, 47; Romulo Zamora, 50; Perpeto Toledo, 44; Dionesio Valeroso, 65; Rico Garnido, 44; Ernesto Formentera, 35; Simon Luchavez, 52; Ronel Ramirez, 35; Alvin Gonzaga, 33; Remegio Gonzaga, 43; Jerry Gonzaga, 44, ug si James Gonzales, 43, pulos mga lumulupyo sa Danao City.
Ang maong panagatan gipanag-iya sa usa ka Alex Gonzaga nga lumulupyo usab sa maong dapit.
Matud ni Police Officer 2 Ederlino Bacusmo sa Sibonga Police Station, nasigpatan sa Bantay Dagat nga sila si Armando Cuizon ug Miguelito Paller ang maong panagatan nga nangisda sa ginadiling dapit sa Brgy. Bagacay.
Matud pa migamit sila og ginadiling kahimanan sa pagpangisda hinungdan nga misumbong sila sa kapolisan hinungdan sa pagdakop kanila.
Hinuon gibuhian ra ang panagatan ug mga tripulante human nga nahusay diha sa munisipyo. – /EIM) (BANAT NEWS)