CEBU, Philippines – Napuno sa mga deboto ang mga simbahang katoliko kagahapong adlawa nunot na sa pagsaulog sa adlaw'ng natawhan sa Mahal nga Birhen Maria.
Sugod pa lang kagahapon sa kaadlawon atol sa gipahigayon nga Mañanita ug Santos nga Misa pahinungod sa maong okasyon misugwak ang bagang duot sa mga tawo, gani dunay uban nga diha na nangatulog sa simbahan samtang nagpaabot sa selebrasyon. Kadaghanan sa mga miadto sa simbahan mga tinun-an, trabahante ug pamilya diin una nilang gihapit ang Sto. Rosario Parish Church aron paghalad og mga pungpong sa buwak.
Samang talan-awon usab ang nakita sa Monastery of the Holy Eucharist sa Sitio Lindugon, Brgy. Simala sa Sibonga diin sagad magtapok ang mga Marian Devotees.
Si Roy Solomon , bitbit ang usa ka tuig pa niya nga anak nitug-an nga angay gyud saulogon ang adlaw nga natawhan sa Mahal nga Birhen.
Sa wali ni Father Jose Adonis Aquino sa gipahigayong misa sa CCTN Oratory Chapel, gihimug-atan niya nga angay ipasalamat ug pahalipayan ang Mahal nga Birhen tungod sa pagsanong niya nga mamahimong inahan sa atong Manluluwas. Dugang ni Fr. Aquino angay usab pasalamatan ang inahan ni Birhen Maria nga si Santa Ana agi og pagpasalamat sa tanang mga inahan. – /EIM) (BANAT NEWS)