CEBU, Philippines – Mga kawani sa Brgy Apas ug Brgy. San Roque ning dakbayan sa Sugbo gipaubos og surprise drug test sa Cebu City Office on Substance Abuse Prevention (COSAP) kagahapon.
Matud sa pangulo sa COSAP, Dr. Alice Utlang, unom ka mga kawani sa Brgy. Apas ang miangkon nga sila tiggamitan og ginadili nga drugas.
Dugang pa ni Utlang nga ang unom nga niangkon wala na gipaubos sa drug test, samtang 117 ka mga opisyal ug kawani ang gipaubos niini.
Ang Apas maoy ika 14 nga barangay sa dakbayan nga napaubos na sa kinalit nga drug test nga kabahin sa kampanya sa siyudad kontra ilegal nga drugas ug drug free work barangay. Samtang niadtong Sabado, 12 ka barangay tanod ang gipaubos sa drug test ug upat niini niangkon nga sila tiggamitan og drugas.
Si Cebu City acting mayor Edgardo Labella buot nga tangtangon ang mga nagpositibo sa drug test ug kadtong mga niangkon.
“They should stop working in the government,” matud ni Labella. Dugang pa ni Labella nga base sa Local Government Code of 1991, ang mga kawani sa lokal nga gobiyerno kinahanglan physically and mentally fit. Hinuon gikumpirmar ni Atty. Clarence Paul Oaminal sa Cebu Anti-Drugs Abuse Council (CADAC) nga wa maapil sa labing apektado sa illegal drugs ang maong duha ka barangay dinhi sa dakbayan. – /EIM) (BANAT NEWS)