CEBU, Philippines - Migahi na ang lawas ug naligo sa kaugalingong dugo dihang nakit-an sa mga anak ang ilang 63-anyos nga amahan nga gipusil sulod sa ilang balay diha sa Brgy. Apo, lungsod sa Argao sa nakalabay nga hapon.
Ang biktima giila nga si Presco Padillo, 63, nagpuyo sa maong dapit.
Matud pa ni Sr. Insp. Alejandro Batobalonos ang hepe sa Argao Police nga nahinabi sa Banat News nagduda nga buntag nahitabo ang pagpatay sa biktima dihang dunay nadungog nga butobuto sa armas sa maong oras.
Walay nanumbaling nga silingan kay nagtuo silang aduna ray nagpasalba og armas. Matud pang Batobalonos, bukid ang lugar ug tungatunga usab sa kamaisan ug lagyo kaayo ang mga balay maong walay nakakita sa mamumuno.
Si Joji, anak sa biktima maoy nakadiskubre sa patay nga lawas sa iyang amahan dihang nauli kini gikan sa iyang lakaw. Gisalikway sa kapulisan ang anggulo nga tulis ang motibo tungod kay walay nawala nga mga butang sulod sa balay. Nagtuo si Batobalonos nga dunay nahibaw-an ang mga anak sa biktima apan wa pay nakahatag kanila og impormasyon.
Igo sa liog, tangkugo ug tiyan ang naangkon sa biktima ug tulo ka basiyo sa bala sa kalibre .45 ug usa ka slug ang nakuha sa crime scene. (Jojo C. Ugdol/EIM)(BANAT NEWS)