CEBU, Philippines – Nagbitay sa punoan sa mangga nga wala na’y kinabuhi ang usa ka 58-anyos nga babaye nga nakit-an sa ila’ng mga silingan sa sitio Danao, Balud, Dalaguete. Gikataho’ng gumikan kay may makita nga mga abat o ungo nga gusto’ng mopatay niya hinungdan nga kini naghikog.
Ang namatay naila nga si Zusana Belia Paulin, minyo, lumad nga taga barangay Obong sa mao’ng lungsod.
Matud ni Police Office 2 Leon Gesim, desk officer sa Dalaguete Police Station, nga ang maong impormasyon gikan sa pamilya sa namatay.
Apan ang bana nga si Alberto, 59, nipasabot sa kapolisan nga dunay nervous breakdown ang iya’ng asawa nga dugay na’ng gihambin. Kanhi nagpuyo sa bukirang bahin sa barangay Obong ang pamilya apan napugos sila og balhin sa barangay Balud human nagsige lang og ingon ang namatay nga duna siya’y makita nga abat nga gusto mopatay kaniya.
Gamit ang pisi gihikot sa namatay sa iya’ng liog nga gibaat sab sa punoan sa mangga. Suway pa unta nga gitabang sa mga silingan si Paulin apan nakabsan gyud sa iya’ng kinabuhi.
Wala’y nakita’ng foul play ang kapolisan sa mao’ng hitabo ug sila nagduda nga ang gihambin nga nervous breakdown ang hinungdan sa paghikog. – /GMR) (BANAT NEWS)