CEBU, Philippines - Wala pa’y pribado’ng kompaniya nga niduso og pormal nga proposal sa pag-ugmad sa Cebu South Bus Terminal ubos sa public-private partnership (PPP).
Matud ni Gobernador Hilario Davide III nga may mga pribado’ng kompaniya nga nagpakita pa lang og interes sa proyekto.
Ang kagamhanan sa probinsiya nagplano sa expansion sa terminal ubos sa PPP.
Plano niini nga himuong commercial complex diin ang ikaduha’ng andana shopping mall ug ang ikatulo’ng andana pension house o hotel nga mapuy-an sa mga pasahero nga gikan sa lagyo nga lugar.
Ang operations manager sa CSBT, Ramon Dumayac, nisugyot kang Davide nga mangutang og P100 milyones sa bangko alang sa expansion sa terminal.
Matud ni Dumayac nga ang mao’ng utang mabayaran kini sa abot sa terminal.
Gani gikan sa buwan sa Enero hangtud sa Hulyo karong tuiga, ang terminal nikita na og P38.5 milyones ug gilauman nga modoble pa kini hangtud sa Disyembre.
Sa nilabay’ng tuig ang CSBT aduna kita nga P63 milyones ug nakuhaan og P20 milyones sa operating expenses ug adunay P40 milyones nga net income. (BANAT NEWS)