CEBU, Philippines – Buot sa Cebu City Local School Board (LSB) nga magpahigayon og Soil Testing sa nahimutangan sa karaang luna sa Busay Elementary School.
Ipahigayon ang Soil Testing ubos sa Office of City Engineering aron pagsuta sa klase sa yuta kun luwas kini sa pagdahili.
Kini aron pagsiguro nga luwas nga balikan ang building nga nagbarog ubos sa gymnasium sa Brgy. Busay.
Matud sa pangulo sa LSB Raddy Diola nga nasuta sa Cebu City Disaster Risk Reduction Management Council (CCDRRMC) nakita nila nga wa ra maunsa ang building bisan sa pag-igo kaniadto sa linog.
Niadtong niaging tuig gipabalhin ang klase ngadto sa Busay Gymnasium tungod sa pagsige og kaligid sa mga bato ug yuta gikan sa ibabaw ug peligro sa mga bata.
Buot ni Mayor Michael Rama ibalik ang kabataan sa daan nga building tungod kay nagsige na usab og dahili ang yuta duol sa gymnasium.
Gisuspenso ang klase sugod niadtong Lunes hangtud karong adlawa ug mabalik lang kini ugma. – /EIM) (BANAT NEWS)