CEBU, Philippines - Plano karon nga ibutang sa Operation Second Chance ang bata’ng giingong gigamit sa grupo sa Salisi nga naluwas sa Fuente Police human nakabiktima ang grupo sa usa ka car dealer ug nakuhaan og P150 mil.
Kini human nasayri sa kapolisan nga 15-anyos ug dili diay 13-anyos ang bata ug nakakuha sila og sertipiko gikan sa Department of Social Welfare and Development nga mahimo na’ng dad-on sa mao’ng pasilidad.
Si Chief Inspector David Señor, officer in-charge sa Fuente Police Station, niingon patong-patong nga kaso ang ila’ng ipasaka batok sa gitumbok nga mga handlers nga sila si Dyna Quan ug ang nakaikyas nga bana nga si Romel Quan.
Kaso’ng theft, child abuse ug paglapas sa Expanded Anti-Human Trafficking Law ang ipasaka samtang kaso’ng pagpangawat ang ipasaka batok sa bata ug gitun-an usab nga pasakaan og kaso ang mga ginikanan tungod sa ila’ng pagpasagad sa anak.
“Separate ang filing sa ginikanan sa pagpabaya nila, mosulod gihapon ang child abuse, gipasagdan lang nila ba kay ang bata man ang mibiya,” matud ni Señor.
Gitug-an ni Señor nga gawas sa 15-anyos, duna pa sila’y laing gipanid-an nga mga batan-on nga gikataho’ng sakop gihapon ni Quan sa grupo nga nag-operate sa Mango Square area ug sa B. Rodriguez Street. (Jojo C. Ugdol/GMR)(BANAT NEWS)