CEBU, Philippines - Ipahigayun karong adlawa ang traffic dry-run sa dakbayan sa Sugbo, Mandaue ug Lapu-Lapu isip pagpangandam sa Asia-Pacific Cooperation (APEC) Meeting. Matud ni Joy Tumulak, operation officer sa Cebu City Transportation Office, nga buot nila’ng masayran ang reaksiyon sa publiko ug sumasakay ingon man ang oras sa dagan gikan sa Shangri-la Mactan hangtud sa Marco Polo, Radisson Blu ug Waterfront Cebu City Hotel.
Ila usab sutaon ang epekto sa re-routing ilabi na sa dalan J. Luna, ang inisyal nga rota nga gitagana nga agian sa delegado sa APEC.
Ang rota sa dry-run gikan sa Shangri-la agi sa Marcelo Fernan Bridge, Plaridel, Ouano Avenue sa Mandaue ug S. Osmeña, J. Luna, J.Y Square area ug tapuson sa Marco Polo.
Moapil sa dry-run ang Land Transportation Office ug mga pangulo sa traffic sa tulo ka dakbayan.
Si Tumulak niawhag sa publiko nga mag-andam sa kinalit nga pag-usab sa mga plano sa traffic.
Dugang dry-run ang ipahigayun pa kung unsay resulta sa himuon karong adlawa. (BANAT NEWS)