Kanhi napriso sa Bilibid gipusil patay

CEBU, Philippines – Patay ang usa ka kanhi binilanggo sa National Bilibid Prison (NBP) sa Muntinlupa City dihang kini girapido sa mga armadong lalaking nagsakay og motorsiklo sa Sitio Cadastral, Brgy. Looc, Dakbayan sa Danao  kagahapon sa kaadlawon.

Si Police Officer 2 Ronald Gomez sa Danao City Police Station miila sa biktima nga mao si Rics Arnold Lauron Gian, 49, nagpuyo sa maong dapit nga nakonbikto kaniadto sa kasong pagpamaligya og ilegal nga drugas apan nakagawas na sa prisohan.

Matud pa ni Gomez, migawas sa ilang panimalay ang biktima ug nagbarogbarog kini sa gawas sa ilang panimalay.

Paglabay sa pipila ka mga gutlo, kalit lamang mitumaw ang motorsiklo nga giluwanan sa duha ka wala mailhing mga lalaki nga kalit nipusil kaniya sa makadaghang higayon ug daling nibiya sa lugar. Dali unta nga gihatod ngadto sa Danao Provincial Hospital apan tungod sa mga samad pinusilan sa liog, abaga, tiyan ug ubang bahin sa lawas, ang biktima nakabsan g’yud sa kinabuhi. – /EIM) (BANAT NEWS)