CEBU, Philippines - Nasakmitan sa kapolisan og duha ka pakete’ng shabu ang usa ka motorista nga nagmaneho nga walay lisensiya sa Purok Petchay, Paknaan, dakbayan sa Mandaue alas 2 pasado sa niagi’ng kadlawon.
Si Senior Police Officer 3 Gregorio Cabizares sa Presinto 3 sa Mandaue City Police Office (MCPO) niila sa nadakpan nga si Neil Tagad, 25-anyos, taga Casuntingan, sa mao’ng dakbayan.
Si Cabizares niingon nga ang team nga gipangulohan sa hepe nga si Senior Inspector Genilo Veraque ang nagpahimutang og checkpoint sa mao’ng lugar.
Si Tagad nahiagi nga wala nag-helmet hinungdan nga dali kini nila’ng gipahunong ug gipangitaan sa lisensiya apan napakyas sa pagpakita.
Gumikan niini ang kapolisan nihimo sa pagrekisa sa kalawasan hangtud nadiskubrehan nga nagdala kini og duha ka gagmay nga pakete sa shabu hinungdan sa pagkasikop. (BANAT NEWS)