CEBU, Philippines – Gituohan nga patyon unta ang magtiayon sa Poblacion Occidental, lungsod sa Consolacion kay ang ilang balay giitsahan og granada nga giibtan na og pin, apan suwerte nga wala makabuto.
Ang wala makabuto nga MK11 fragmentation grenade, nakaplagan kagahapon sa buntag sa tag-iya sa balay nga si Jovanin Capangpangan. Si Jovanin ug ang iyang asawa nga si Michelle miingon nga wala sila’y kontra.
Hinuon, si SPO3 Reynario Patillas, desk officer sa Consolacion Police Station, miingon nga adunay ilang silingan nga gikalalis nila kay mikatkat sa kural ug mikuha’g hulagway sa palibot.
Matud sa kapolisan nga ang granada nga wala na’y pin, aduna pa’y kahigayonan nga mobuto. – /RUB) (BANAT NEWS)