CEBU, Philippines – Magpatabang sa Cebu Provincial Police Office (CPPO) ug sa Kapitolyo si Napo, Carcar City kapitan Ronel Nacua sa problema sa drugas ug krimen sa iyang barangay.
Sukad sa nilabay’ng lima ka tuig hangtud karon, giingong anaa gihapon ang maong problema ug mas nisamot pa hinuon.
Matud ni Nacua nga nalipay na unta siya sa presensiya sa mga polis nga gipakatap sa CPPO apan kalit lang gi-pull-out ug wala na’y update kung ipang-balik pa ba sa ilang lugar.
Drugas ang gitumbok nga hinungdan sa krimen sa ilang barangay sama sa patay ug kawat.
Nabalaka ang kapitan nga mosiaw pa unya ang mao’ng problema gumikan kay nagkadaghan sab ang mga istambay nga sagad mag-apil-apil sa ilegal nga binuhatan.
Ang barangay Napo nahimutang sa hilit nga bahin sa dakbayan.
Matud ni Nacua nga modangop siya sa Kapitolyo aron matabangan siya sa peace and order sa iyang barangay nga alarming na sa pagkakaron.
Giangkon ni Nacua nga lisud pakgangon ang isyu mahitungod sa illegal drugs bisan sa ka istrikto sa balaud nga nagsilot niini.
Hinuon nisalig si Nacua sa CPPO ug Kapitolyo nga mahatagan siya sa iyang hangyo.
Sa pagkakaron gipahimuslan una ni Nacua ang mga barangay tanod ug ang kanunay nga awhag sa publiko nga i-report sa kapolisan kung may mga tawo nga kadudahan ang lihok sa ilang lugar. – /GMR) (BANAT NEWS)