CEBU, Philippines - Gidapigan sa mga negosyante sa Sugbo si Presidente Benigno Aquino III luyo niining mga panawagan sa pipila ka hut-ong sa katilingban pagpakanaog kaniya sa pwesto tungod sa Mamasapano encounter diin 44 ka polis ang namatay. Ang presidente sa Cebu Chamber of Commerce and Industry (CCCI) Ma. Teresa Chan miingon nga di perpekto si Aquino apan daghan kini og nahimo nga nakatabang sa nasud sama na lang sa iyang paggukod niadtong mga kurap sa gobiyerno.
Matud pa ni Chan, ang susama ni Aquino og polisiya ug dagan sa pamunoan ang gikinahanglan sa nasud karon. Alang sa CCCI, wala nila tan-awa ang mga bati nga gipasangil kang Aquino kondili ang mas daghan niining nahimo alang sa katawhan ug sa nasud.
Matud pa sa mga negosyante, kadtong mga nanawagan sa pagpalagpot sa presidente adunay personal nga interes ug dili alang sa kadaghanan.
Giawhag hinuon niya ang tanan nga huwaton ang 2016 Elections inay nga mohimo og mga kagubot aron lang mapapha sa pwesto si Aquino. Matud ni Chan, ang political stability maoy usa sa tan-awon sa mga investors una sila mobubo og puhonan sa usa ka nasud.
Usa hinuon si Chan sa gusto nga tun-an pagbalik ang Bangsamoro Basic Law (BBL) ug dili dalidalion ang pagpasar niini. Kini aron pagseguro nga balanse alang sa tanan ug dili lang pabor sa MILF. (Decemay P. Padilla/EIM)(BANAT NEWS)