CEBU, Philippines - Gisikop sa kapolisan ang usa ka 62-anyos nga babaye human nasakmitan og dakong putos sa gituohang shabu sa Barangay Poblacion, dakbayan sa Toledo sa nakalabay’ng adlaw.
Giila ang dinakpan nga si Ryana Maningkara Sauman, 62, taga San Carlos City, Negros Occidental. Ang kapolisan nakadawat og impormasyon bahin sa presensiya ni Sauman sa usa ka kan-anan sa Toledo City Public Market nga aduna kini dala nga ilegal nga drugas. Sa pagsusi nila ni Superintendent Ricky Delilis ug Inspector Jose Cañafuego ug mga sakop sa maong lugar ilang nakita ang suspek.
Dihang ilang giduol giingong misuway kini og ikyas apan nagunitan kini ni PO2 Melchezideck Batomalaque.
Sa pagrekisa kaniya nasakmit gikan niini ang usa ka dako nga putos nga adunay sulod nga gidudahang shabu nga gisud sa sobre. Gibana-bana nga mobalor og P75 mil ang maong ilegal nga druga. Gisubay na karon sa kapolisan kun asa gikan ug asa dad-on ang maong drugas. Samtang nadakpan sa Sitio Hengel, Barangay Banilad, Dakbayan sa Mandaue si Daniel Apor Greemar, 25, human gikatahong nibaligya og marijuana sa mga polis.
Ang mga sakop sa Presinto 4 sa Mandaue City Police Office (MCPO) nga gipangulohan ni Senior Inspector Hugo Rio Uy Ipong milusad og buy-bust operation nga miresulta sa iyang pagkasikop.
Matud pa nga gipalitan siya sa polis og usa ka stick sa Marijuana sa kantidad nga P100 hinungdan nga kini gidakop. Dugang siyam ka stick niini ang nasakmit atol sa pagrekisa kaniya. (BANAT NEWS)