CEBU, Philippines - Patay ang usa ka 7- anyos nga batang lalaki human kini nabanggaan sa usa ka cargo truck nga gimaneho sa usa ka German national diha sa Barangay Atabay lungsod sa Alcoy kagahapon sa alas 11:45 sa buntag.
Ang namatay mao si Jayvee Antido, nagpuyo sa maong lugar, samtang ang langyaw giila nga si Michael Feyeabend, 69, temporaryo nga nagpuyo sa nahitaboan.
Matud pa ni Police Officer 2 Howard Maynopas, desk officer sa Alcoy Police nga nahinabi sa Banat News, nagduwa sa iyang bisikleta ang bata kauban sa iyang mga amigo dihang nabanggaan sa maong langyaw.
Dali nga gidala sa Julio Cardinal Rosales Memorial Hospital ang bata apan patay na kini pag-abot sa maong tambalanan.
Gitanggong na sa kapolisan ang langyaw samtang nagpaabot kung kini pasakaan og kaso. (BANAT NEWS)