CEBU, Philippines – Nagpatabang ang mga residente sa sitio Panaghiusa, barangay Tingub, dakbayan sa Mandaue sa problema sa pag-awas sa sapa gumikan sa pag-abuno og anapog sa agianan sa tubig.
Kuyog sa pipila ka residente, giadto sa Banat News ang sapa nga gi-abunohan ug nakita nga dili na kalahos ang tubig ug nagtapun-og ang basura sa maong lugar.
Usa sa mga reklamante nga si Meloni Languido nagkanayun wala sila’y problema kun abunohan ang maong lugar apan kinahanglan nga duna’y kaagian ang tubig aron dili mosaka ang tubig ug mosulod sa kabalayan.
Dugang reklamo sa mga molupyo ang kabaho sa sapa nga ilang gihulagway nga makadaut sa ilang panglawas ilabi na sa mga bata.
Gisusi usab ang kabalayan sa mga nireklamo’ng mga residente ug nakuhaan og video ang nagpundo’ng lagom nga tubig nga gibalayan na sa mga lamok.
Nasayran nga gipaabot na sa mga residente ngadto sa ilang barangay ang maong reklamo.
Ang chairman sa committee on environment sa barangay, konsehal Oliver Ouano, niingon nga nakalapas sa barangay ordinance ang nag-abuno sa sapa.
Dugang ni Ouano nga kun gipahibawo lang sila dayun, nahimoan na unta og aksiyon.
Gitataw usab sa konsehal nga magkinahanglan na gyud og backhoe aron hawanan ang sapa. – /GMR) (BANAT NEWS)