CEBU, Philippines – Usa ka mag-uuma ang gipusil patay sa lalaki nga gikaabot niini sa usa ka imnanan sa Sitio Gimbal, Barangay Canamocan, Lungsod sa Compostela.
Si Senior Police Officer 3 Pedro Enriquez sa Compostela Police Station miila sa biktima nga mao si Vicente Calisa, samtang ang suspetsado nailhan lamang sa angga nga Boy.
Matud pa ni Enriquez, ang biktima ug mga higala nag-inom sa usa ka tindahan sa maong dapit ug ilang naabtan ang suspetsado nga nag-inusarang nag-inom. Sumala pa nga dihang nangahubog na nanagko na ang ilang mga tingog hangtud nga nagkabingkil na hinuon ang suspek. Wa magdahom ang biktima nga armado diay ang suspek ug diretso kining mibunot sa armas dayong pusil sa wala nga dughan niini. Dali nga misibat palayo sa maong dapit ang suspetsado ug ang biktima dali untang gihatod sa Danao Provincial Hospital apan gideklarar kini sa mga doktor nga dead on arrival. – /EIM) (BANAT NEWS)