CEBU, Philippines - Usa ka 68-anyos nga tiguwang ang namatay human naligsan sa usa ka Chevrolet SUV ug maayong pagkalagpot sa yellow railings ubos sa Marcelo Fernan Bridge sa Barangay Pusok dakbayan sa Lapu-Lapu.
Ang biktima mao si Marcelino Lubos, usa ka residente sa dakbayan sa Mandaue nga adunay gidala nga sako sa mga scrap materials.
Si Police Officer 3 Giovanni Babano sa Traffic Enforcement Unit sa Lapu-Lapu City Police Office nagkanayon nga naligsan si Lubos sa usa ka Chevrolet-Sports Utility Vehicle nga adunay temporary plate number #7AT- 159067 ug gipanag-iya ni Joselita Luza, nagpuyo sa Pilar, Bohol .
Giingon nga padulong saka sa maong taytayan si Luza gikan sa Lapu-Lapu padulong sa Mandaue dihang iyang nadasmagan si Lubos. Daling gidala sa Lapu-Lapu City District Hospital apan gibalhin kini sa Mactan Doctor's Hospital ug didto na kini gideklarar nga dead on arrival. Kasamtangang gibalhug sa Lapu-Lapu City Detention Cell ang suspetsado human sa insidente. (BANAT NEWS)