CEBU, Philippines – Usa ka public school teacher ug siyam ka mga tawo ang nasikop sa kapulisan sa Danao sulod sa usa ka payag samtang giingong nanuyop og gidudahang drugas diha sa Highway sa Looc dakbayan sa Danao.
Ang mga nasikop naila nga sila si Wilfredo Goc-ong, 56, public school teacher sa lungsod sa Compostela, Jeneboy Capuyan, 25, Rodney Parato, 23, Jaunito Capuyan, 37, Christopher Peñas, 34, Arnel Pasana, 21, Carlo Ceniza, 21, Alex Manco, 47, Jonathan Lingatong, 36 ug usa ka minor de edad nga babaye. Matud pa ni Police Officer 3 Nelson Pantoja ang desk officer sa Danao City Police nga nahinabi sa Banat News nakadawat sila og text message kabahin sa mga tawo nga kadudahan og lihok nga nagtapok sa maong lugar.
Miresponde ang mga polis sa dapit hangtod nga ilang nadumduman ang usa ka payag ug didto sa sulod ilang naaktohan ang grupo nga gidudahang nanuyop og gituohang drugas.
Ang napulo ka mga dinakpan pulos nakuhaan og mga drugas apil mga drug paraphernalia.
Sa gihimo nga interogasyon sa kapulisan daku na lang ang ilang kahikurat sa dihang ang usa sa mga dinakpan mitug-an nga kini usa ka maestro sa Compostela. Siya nakuhaan og usa ka paketeng gituohang shabu, duha ka linukot nga tisyu ug duha ka improvised tooter.
“Nakurat na lang mi pag-ingon niya nga maestro diay siya sa Compostela, dalaw ra daw siya diri,” matud pa ni Pantoja.
Wala na motug-an ang dinakpan kung asa kini nga tunghaan nagtudlo ug wala na sab kini mitug-an kung kinsa ang iyang kauban nga miadto sa maong lugar.
Gisubay pa sa kapolisan kun kinsa ang nagtukod sa maong payag nga gihimong drug den.
Kasong paghupot og drugas ug paraphernalia ang atubangon sa mga dinakpan nga karon kasamtangan nga gitanggong sa karsel sa Danao Police. – /EIM) (BANAT NEWS)