CEBU, Philippines - Nihatag og usa ka milyon ka pesos ang Department of Labor and Employment (DOLE) sa pagpalambo sa pagpamuhat og silhig sa barangay Paknaan, dakbayan sa Mandaue.
Matud ni barangay Kapitan Malaquias Soco nga tinguha nila nga mapalambo ang panginabuhi sa katawhan pinaagi sa silhig nga ilang nasunod sa ilang katiguwangan.
Ilang tinguha nga ang produkto mabaligya dili lang sa lokal nga kamerkaduhan kun dili lakip na sa gawas sa nasud sa umaabot pa nga katuigan.
Gipasiugdahan ang Silhig Festival matag tinuig nga pangilin ni Senior Sto. Niño isip paagi sa pag-promote sa ilang dapit ug sa ilang produkto.
Ang Silhig Festival ipahigayun karong Domingo, Pebrero 15.
Gitukod ang Paknaanon Multi-Purpose Cooperative sa niaging upat na ka tuig ug maoy gitahasan sa pagbaligya sa ilang hinimo nga silhig ngadto sa lainlaing dapit. (Romeo T. Limpangog/GMR)(BANAT NEWS)