CEBU, Philippines - Magtigum na karong semanaha ang mga sakop sa Adhoc Oversight Committee aron ilang sutaon kun pila ka ordinansa nga giaprobahan sa Cebu City Council atol sa ika-12 ug ika-13 nga Sanguniang Panglungsod nga wala kaayo ikapatuman.
Si Konsehal Alvin Dizon maoy misugyot nga ang mga sakop sa Adhoc Committee nga gipangulohan ni Vice Mayor Edgardo Labella magtigum agi og pagtuman sa lagda nga magtigum sila labing menus kausa sa usa ka buwan. Gawas ni Labella, ang ubang sakop sa Adhoc Oversight Committee naglakip ni Konsehal Dizon isip vice-chairman, ug mga sakop nga sila si Konsehal Nendell Hanz Abella, Sisinio Andales, Eugenio Gabuya Jr., Margot Osmeña ug Mary Ann Delos Santos.
Nabantayan sa mga konsehal nga daghan kaayo sa kapin sa 2,000 ka ordinansa sa dakbayan sa Sugbo ang wala na ikapatuman ilabi na nga kadaghanan sa kapolisan wala masayod kun unsa kini nga mga ordinansa.
Ubos sa balaod ang mga mayor maoy gitahasan sa pagpahigayon og “periodic seminar” aron nga pahibaw-on ang mga polis kun unsa nga ordinansa sa dakbayan ug mga lungsod ang angay’ng ipatuman sa mga polis. (BANAT NEWS)