CEBU, Philippines – Gilungkab ang usa ka balay sa dakbayan sa Carcar samtang ang tagbalay nitambong sa solemn procession sa Senior Santo Niño sa dakbayan sa Sugbo.
Ang balay nga gilungkab gipanag-iya nilang Reynaldo ug Geralyn Manayaga sa barangay Valencia ug ang gitumbok nga nilungkab mao ang ilang paryente nga si Edelberto Tangag Jr., 33, kinsa nagpuyo ra sab sa maong lugar.
Matud ni SPO3 Jorame Tanud-tanud, chief investigator sa Carcar Police, nga nibiya sa ilang balay ang magtiayon aron motambong sa relihiyoso’ng kalihukan sa Sugbo.
Niuna og uli si Reynaldo ug iya na lang nabantayan nga giguba na ang screen door ug mismo ang pultahan sa balay ug nawala na ang mga mahalong alahas nga mikantidad og kapin P100,000. Si Tangag ang gidudahan sa magtiayon sanglit makaduha na kini nanglungkab sa ilang tindahan apan kini gipasaylo lang.
Sigun pa ni Tanud-tanud nga atol sa iyang pag-imbestigar kang Tangag, kini wala nahimutang hangtud nga ila na lang giingnan nga motug-an na lang hangtud nipagawas sa iyang mga nakuha nga alahas hinungdan nga gisikop. Matud ni Tanud-tanud nga wala na’y plano nga mopasaylo ang magtiayon ug mopasaka na og kaso batok sa dinakpan kinsa kasamtangang gitanggong sa karsel sa Carcar Police. – /GMR) (BANAT NEWS)