CEBU, Philippines – Kapolisan sa Sugbo nakadakop og mga drug personalities sa Cebu City ug sa probinsya sa Sugbo nga miresulta sa pagkasakmit sa dul-an P200 mil nga shabu sa managlahing mga operasyon. Sa Cebu City, nadakpan sa Regional Anti-Illegal Drugs Special Operations Task Group-7 ang usa ka gidudahang level 2 drug pusher sa Sitio Muhon 2, Barangay Tisa dakbayan sa Sugbo, niadtong nakalabay nga gabii, atol sa gihimo nga buy-bust operation.
Ang dinakpan naila nga si Enrique Aguilar, 44, minyo ug nagpuyo sa maong lugar. Matud pa ni Senior Inspector Joey Bicoy, team leader sa RAIDSOTF-7 nga nahinabi sa Banat News, duha ka semana nilang gipaubos sa surveillance si Aguilar. Gipalitan siya og balor P10 mil nga shabu gamit ang budol nga kwarta hinungdan sa iyang pagkasikop ug pagkasakmit sa usa ka medium size ug unom ka gagmay sa pakete nga gituohang drugas nga mikantidad og P180,000.
Si Aguilar nadakpan na kaniadto sa kaso gihapon sa drugas apan nakapiyansiya kini.
Samdan ang usa ka drug pusher nga giilang si Mark Anthony Rubio,34, nga taga Barangay Binaobao, Bantayan, human napusilan sa mga polis atol sa buy-bust operation diha sa Doña Homes, Barangay Bantigue, Bantayan. Nadakpan usab si Rodney Rubio,38, diha sa Bantigue ug Ador Bordaje, 32, nga nakuhaan tanan og ilegal nga drugas ug drug paraphernalia.
Matud pa nga gipalitan og shabu ni PO1 Isabelo Carcena nga balor P1,500 ang suspek nga si Mark Anthony apan giingong giilog niini ang armas sa polis hinungdan nga napusilan sa tuong paa.
Nakuha sa kapolisan sa tulo ang 15 ka pakete sa gituohang shabu, 60 ka empty packs nga gituohang gisudlan og shabu, drug paraphernalia, ug P8,200 mil nga gituohang halin sa pagpamaligya og ilegal nga drugas.
Samtang nadakpan sa buy -bust operation ang usa ka babayeng gipasanginlang pusher nga si Muriel Araneta, 27, ug iyang kustomer nga si Esteban Soco, 28, diha sa Purok Camote, Barangay Cambaro, Dakbayan sa Mandaue.
Nakuhaan kini og walo ka paketeng shabu ug P200 nga buy-bust money isip ebidensiya sa pagkasikop niini. Si Soco giingong nadakpan kay naaktohan kining mipalit usab og usa ka paketeng shabu ug drug paraphernalia kang Araneta.
Samtang nag-uban na hinuon sa prisohan ang usa ka drayber sa habalhabal nga si Jonas Gica ,26, ug iyang amigong bilanggo nga iyang gibisita sa Danao City Jail human siya nakuhaan og usa ka paketeng shabu sa jailguard.
Matud pa ni Police Officer 3 Nelson Pantoja sa Danao Police Station nadakpan si Gica ni Senior Jail Officer 3 Joselito Fernandez dihang nasakpan ang usa ka paketeng shabu sa iyang brief. – /EIM) (BANAT NEWS)