CEBU, Philippines – Human sa pagkusokuso sa bagyong Seniang niadtong Lunes sa gabii, kagahapon sayo sa buntag ang mga pasahero nga na-stranded ug gustong mouli sa ilang tagsa-tagsa ka probinsiya nagpunsisok na sa mga pantalan ug ang uban milinya na sa mga ticketing office.
Sa Pier Uno sa dakbayan sa Sugbo, bisan og gisirad-an ang gate naglinya nang daan ang mga pasahero bisan nagbunok pa ang uwan aron makauna lang og palit og tiket sa pangagpas nga libkason na ang storm warning signal. Gani dunay pipila kanila ang wala gyud mobiya sa pantalan ug nagpaabot kun kanus-a mohatag og abiso ang PCG nga mahimong nang makabiyahe ang mga barko. Way pasahero nga gustong sugaton ang Bag-ong Tuig sa pantalan mao nga kutob sa ilang mahimo kinahanglang makauli sila sa ilang mga probinsya.
Hinoon, si PAGASA Visayas director Engineer Oscar Tabada milibkas na sa Public Storm Warning Signal sa pipila ka bahin sa Sugbo ug Northern Cebu lakip na usab ang Bohol. Apan ang Habagatang bahin sa Sugbo kinsa maoy grabe nga gikuso-kuso sa bagyong Seniang gipaubos na lang sa Storm Signal No. 1. Tungod niini, gitugotan na sa Philippine Coast Guard nga makabiyahe ang barko paingon sa Bohol ug Ormoc. – /EIM) (BANAT NEWS)