17-anyos patay sa videokehan

CEBU, Philippines – Patay ang 17-anyos nga helper sa ihawan ug samaran ang kauban nga usa ka construction worker human sila gidunggab sa usa ka truckboy nga ilang kainom sulod sa videokehan sa Lower Calajo-an, Minglanilla gahapon sa ala 1:20 sa kadlawon.

Ang biktima giila nga si Cargie Nebril Giltendez samtang ang nasamdan mao si Junrey Mercado Diez, 23-anyos, pulos ulitawo ug mga molupyo sa maong dapit.

Giila ang suspek nga si Ronald Gallego Albajer, 32-anyos, ulitawo, ug molupyo sab sa maong dapit.

Duha ka saksi nga sila si Mil June Sanchez ug Raniel Cañete miasoy nga samtang nag-inom sila kuyog ang suspek ug ang duha ka biktima, kalit lang nga nihulbot ang suspek sa dala nga kutsilyo dayon giduslak og una si Giltendez ug sunod nga gidunggab si Diez.

Daling gidala sa Minglanilla District Hospital ang duha ka biktima apan gideklarar nga dead on arrival si Giltendez kinsa nakaangkon og samad dinunggaban sa walang bahin sa dughan.

Si Diez nga nakaangkon og samad dinunggaban sa iyang likod ang gibalhin sa Vicente Sotto Memorial Medical Center.

Ang suspek nga hubog niadtong higayuna ang hugtanong mihimakak nga siya ang nidunggab sa mga biktima.

Apan sa follow-up operation sa kapolisan, positibo nga giila sa mga testigo ang suspek hinungdan nga nagtingkagol kini karon sa prisohan samtang naghuwat sa tukmang kaso nga ipasaka batok kaniya. – /GMR) (BANAT NEWS)