CEBU, Philippines - Ipaubos na sa imbestigasyon ang usa ka department head sa Kapitolyo kinsa’ng hulagway nga may kaubang babaye nga gigakos ug gisabak sa beach resort ang nikatap sa internet.
Giingong pulos minyo ang duha. Si Gob. Hilario Davide III nagkanayon kagahapon nga gisultihan siya sa provincial administrator kabahin sa maong mga hulgway nga mikatap.
Matud ni Davide nga gimandoan niya si Provincial Administrator Mark Tolentino nga hatagan og due process of law ang department head ug ipaubos kini sa imbestigasyon sa Committee on Discipline and Investigation (CODI).
Kalapasan sa Code of Conduct and Ethical Standards for Public Officials and Employees ang hayan atubangon sa maong opisyal.
Matud ni Davide nga usa sa bug-at nga silot sa makalapas sa maong balaud ang pagkatangtang sa serbisyo.
Dugang niya nga si Atty. Orvi Ortega, ang provincial legal officer ug pangulo sa CODI, ang gitahasan sa pagpahigayon og imbestigasyon sa maong isyu. (BANAT NEWS)