Duha natabunan patay

CEBU, Philippines - Duha ka tawo ang nangamatay sa managlahing aksidente human sila nangatabunan ug naligiran og balas ug bato sa lungsod sa Compostela ug Talisay City.

Natabonan sa midahili nga balas ang nangubkob nga si Jerson Yatan, 28, diha sa sapa  nga iyang gikubkob sa Barangay Tamyao, Compostela.

Si Senior Police Officer 2 Pedro Enriquez sa Compostela Police Station  miingon nga ang kabanay sa namatay mitug-an nga sayo pa sa hapon niadtong adlaw nga Domingo nangubkob og balas sa kilid sa sapa si Yatan. Apan nahibulong sila nga naabtan na lang og alas- 7 sa gabii wala pa gihapon kini makauli sa ilang panimalay  hinungdan sa ilang kabalaka  ug gipangita kini kuyog sa pipila ka mga silingan.

Gamit ang flashlights ug lamparilya ilang gisubay ang dapit diin mangubkob og balas si Yatan, apan wala kini didto, hangtud nga dunay nakabantay sa nagbundo nga balas  kilid sa maong sapa nga daw gikan sa ibabaw.

Gisulayan sa pagkubkob sa nangita nga sakop sa pamilya ug mga silingan ang midahili nga balas ug ilang nadiskubrehan sa ilawom nga natabonan ang biktima ug wa nay panimuot. Ilaha kining  gidala sa Danao District Hospital apan gideklarar kini sa mga doktor nga patay na.

Si   Camelo Tejero nga maoy municipal planning and development officer sa Compostela mibutyag sa  Banat News nga ang quarrying operation permits gitugot lang sa bukid.

Samtang usa ka 43-anyos nga ginang nga si Mila Dable, taga Sinsin, Cebu City ang namatay human kini maligiran og mga dagkong bato gikan sa bukid nga miigo sa iyang ulo samtang nagsakay kini og motorsiklo sa Brgy. Manipis, siyudad sa Talisay.

Naangol ‘sab ang bana sa biktima nga mao ang nagmaneho sa motor ug ang ilang duha ka mga anak nga nakaangkon lang og mga ginagmay nga pangos ug bun-og. Ang pamilya gidala sa mga sakop sa Talisay Rescue and Emergency Action Team (TREAT) sa Talisay City District Hospital apan patay na ang ginang.

Matud pa ni Police Officer 1 Paula Lumakan sa Talisay City Police Station nga kaniadto pa gideklarar nga peligro ang maong lugar tungod sa pagsige og pangaligid sa mga bato gikan sa ibabaw ilabi na kung adunay kusog nga uwan.

Tungod sa hitabo, subling mipagawas og pahibalo ang Department of Environment and Natural Resources (DENR-7) nga base sa ilang Geo Hazard Threat Advisory, ang Campo 4 hangtod na sa Campo 6  gikonsiderar nga peligro alang sa mga motorista.

Matud sa tigpamaba sa DENR-7, Eddie Llamedo nga bisan unsang orasa mahitabo gyud ang pagdahili sa yuta sa maong lugar.

Ang DENR gikatakdang moinspeksyon pagbalik sa maong dapit. Romeo Limpangog, Decemay P. Padilla ug Sharmaine Kaye ObraEIM (BANAT NEWS)