Mga kawani sa treasurer’s office sa Compostela i-lie detector test

CEBU, Philippines – Gipaubos sa polygraph test ang mga kawani sa treasurer’s office sa lungsod sa Compostela diha sa buhatan sa National Bureau of Investigation (NBI-7) subay na sa nahitabong pagpanglungkab sa ilang buhaton niadtong buwan sa Agosto ning tuiga.

Si Cleofe Gonzaga, municipal treasurer maoy nangulo sa mga empleyado pag-adto sa buhatan sa NBI-7 alang sa polygraph exam.

Nagkanayon si Gonzaga nga ang kapulisan sa Compostela maoy nag-request sa NBI sa pagpahigayon sa lie-detector test isip kabahin sa ilang nagpadayong imbestigasyon sa nahitabong pagpanglungkab.

Hangtod karon, wala pa matumbok kun si kinsa ang naglungkab sa treasurer’s office sa Compostela diin P66 mil ang nakuha gikan sa vault.

Kahinumduman nga sunod-sunod ang nahitabong pagpanglungkab sa mga treasurer’s office sa nagkadaiyang lungsod dinhi sa Sugbo.

Hinuon, si Gonzaga nagtuo nga dili inside job ang nahitabo ug walay labot ang mga kawani sa treasurer’s office sa Compostela sa pagkahanaw sa kwarta sa vault.

Sigon pa sa municipal treasurer nga gawas nga edaran na iyang mga sakop pulos usab regular employees ang kolektor ug nagtuo siyang dili sila magbinuang sa ilang trabaho.

Nasuta nga 12 ka mga kawani ang gikatakda nga ipaubos sa polygraph examination apan dili idungan ang tanan aron dili mabiyaan ang ilang trabaho sa lungsod. – /EIM) (BANAT NEWS)