CEBU, Philippines - Usa ang patay samtang usa ang angol sa tulo nga nagduwa og baraha dihang gipamusil sa 21-anyos nga hubog kinsa nasuko nga wala hatagi sa gipangayo nga P40.
Ang insidente nahitabo sa sitio Humay-Humay, barangay Gun-ob dakbayan sa Lapu-Lapu kagahapon sa alas 3:30 sa kadlawon.
Ang mga biktima mao sila Resmil Tampus, 31-anyos ug Jerome Mentiza, 26-anyos, pulos mga residente sa mao nga dapit.
Laing biktima ang ilang higala nga si Elias Muto, kinsa nagpuyo sa Muslim Compound sa barangay Pajo.
Matud ni SPO1 Allan Frederick Pantaleon sa Lapu-Lapu City Police Office nga samtang nagduwa ang duha og baraha, kalit nitunga ang suspek nga si Gimund Espinosa, residente sa Gun-ob, sa ilang tungod nga hubog.
Si Espinosa nangayo og P40 sa tulo ka biktima apan nagdumili sila sa paghatag hinungdan nga nasuko ang suspek ug nagpagawas sa iyang armas ug gipamusil diha-diha ang tulo ka biktima dayun sibat.
Si Tampus kinsa napusilan sa may liog daling gidala sa Lapu-Lapu District Hospital apan dead on arrival samtang si Mentiza gidala sa Mactan Doctor's Hospital ug si Muto gidala sa Vicente Sotto Memorial Medical Center.
Ang duha pulos nakaangkon og samad pinusilan sa likod nga bahin sa ilang lawas. (Christell Fatima M. Tudtud/GMR)(BANAT NEWS)