CEBU, Philippines - Gihimakak sa hepe sa Fuente Police Station sa Cebu City Police Office nga gituok sa iyang sakop ang kanhi bise mayor sa lungsod sa Sogod nga ilang gidakop ug gipasakaan og kasong Malicious Mischief kagahapon diha sa piskalya.
Gidakop niadtong nakalabay nga adlaw sa P. Del Rosario Extension, Sambag 1 ning dakbayan si kanhi bise mayor Dean Dosado human nga naabtang nanghasi sa dapit.
Si Chief Inspector Wildemar Tiu ang hepe sa Fuente Police Station nga nahinabi sa Banat News miingon nga iyahang naestorya ang iyang sakop nga maoy gitudlong mituok ni Dosado apan hugot kini nga mihimakak sa alegasyon.
Sigun pa ni Tiu nga igo lang gihawiran si Dosado pagpasulod sa prisohan, gani mismo si Dosado nga iyang gipangutana wala mokompirmar nga gituok kini sa maong polis ug wala kini planong mopasaka og kaso batok niini.
Kagahapong adlawa wa mahuman ang pagpasaka sa kasong malicious mischief batok ni Dosado apan tiwason karong adlawa.
Gitun-an pa usab kung mahimong makasohan og trespassing si Dosado kay dili man kini taga didto sa nahitaboan.
Gibarogan ni Tiu nga igo lang mihimo sa trabaho ang iyang mga sakop pinaagi sa pagdakop kang Dosado nga maoy ilang naabtang maoy nanghasi sa lugar. (BANAT NEWS)