CEBU, Philippines - Usa ka priso sa Presinto 1 sa Mandaue City Police Office (MCPO) ang nakaeskapo apan nadakpan pagbalik kay miuli sa ilang balay niadtong Domingo.
Ang nadakpan og balik mao si John Harley Heyrosa, taga Barangay Tipolo, Dakbayan sa Mandaue kinsa nag-atubang og kaso nga ilegal nga paghupot og armas.
Si Chief Inspector Jimmy Aguisanda ,hepe sa nahisgotang presinto maoy nangulo sa padakop og balik kang Heyrosa pipila ka oras human sa pag-eskapo niini.
Gikatakdang imbestigahon ang on-duty nga polis nga si Police Officer 3 Victor Isidro tungod sa pag-eskapo ni Heyrosa.
Matud pa giguba ni Heyrosa ang padlock sa detention cell nga wala mabantayi ug pagkahuman migawas sa presinto.
Apan nadakpan siya pagbalik human nga miapas kaniya ang mga polis sa ilang balay sa Mantuyong.
Nasayran usab nga ang mga kauban ni Heyrosa sa karsel maoy nakamatikod nga naguba na ang padlock ug wala na si Heyrosa mao nga gitawag nila ang mga polis ug gitug-anan sa ilang nadiskubrehan. (BANAT NEWS)