CEBU, Philippines - Pila ka adlaw na lang ang paabuton ug saulogon na sa tanan ang Pasko ug usa sa gipaabot sa mga mamumuo mao ang katunga sa 13th month pay nga ihatag sa mga employers.
Gipahinumduman ni Atty. Jose Ogang, mediator sa Department of Labor DOLE-7 ang tanang mga kompanya paghatag sa 13th month pay sa ilang mga empleyado sa di pa ang Disyembre 25.
Base sa Labor Code of the Philippines, gikinahanglan nga mohatag ang mga employers sa 1/2 sa basic salary sa usa ka empleyado isip bonus.
Hinuon ang katunga niini mamahimong ihatag sa tunga-tungang bahin sa tuig.
Ang mga kompanyang dili motuman niini mahimong ireklamo tungod sa paglapas sa Republic Act 8188 o Double Indemnity Law.
Samtang lakip sa gipahinumdom sa DOLE-7 mao ang pagpatuman sa Cost of Living Allowance alang sa mga minimum wage earners sa Central Visayas.
Sa Metro Cebu ang mga kawani kinahanglang gidugangan og P13 nga COLA gikan sa P327 nga minimum wage mamahimo na kining P340. Nagsugod ang pagpatuman sa COLA niadto pang buwan sa Marso ning tuiga. (BANAT NEWS)