CEBU, Philippines - Nag-abot ang mga reklamante batok sa nagpailang nurse nga na-entrap sa National Bureau of Investigation-7 diha sa ilang buhatan.
Si Assistant regional director Dominador Cimafranca nagkanayon nga ang nadakpan mao si Raymond Lequin, 31, alyas Bryan Enriquez nga taga Yakal St., Ponce Compound, Capitol, Cebu City.
Nadakpan si Lequin dihang usa ka agent sa NBI ang ni- post sa online shopping website nga olx.ph nga duna kini ibaligya nga cellphone ug nagsabot silang magkita sa usa ka tambalanan niadtong Miyerkules.
Apan human matan-aw ni Lequin ang maong cellphone, nananghid siya nga iyang tan-awon sa sud kung mo-charge ba kini apan diay misibat na kini apan nasayod na ang mga sakop sa NBI sa sunod niyang buhaton hinungdan nga kini gidakop.
Nakuha usab ang motor nga giingong getaway vehicle ni Lequin. Nasayran usa ka Gigi Quilo, 27, nga taga Mandaue City nga nag-post usab sa maong website ang nabiktima ni Lequin niadtong Oktubre 23, 2014, gisibat niya ang cellphone.
Kagahapon usa ka polis sa Carbon Police Station ang nagdala sa warrant of arrest ngadto sa NBI nga giisyu ni RTC Judge Raphael Yrastorza tungod sa kasong qualified theft batok sa suspek tungod kay gikawatan niini ang iyang agalon samtang sales clerk pa kini.
Samtang usa usab ka representante sa Sacred Heart Hospital ang positibong miila kang Lequin nga maoy misulod sa lawak sa ilang pasyente ug gikawat ang P2,000 cash ug cellphone sa pasyente. (BANAT NEWS)