CEBU, Philippines – Supak ang mga residente ug mga tagtungod sa mga namatay nga gilubong sa Doña Pepang Cemetery nga himuong park ang maong sam-ang.
Gipahibawo sa Division for the Welfare of the Urban Poor (DWUP) nga sugod Nobiyembre 15 sirad-an na sa publiko ang maong sam-ang alang sa “Redevelopment and Beautification Project” sa dakbayan sa Sugbo.
Giawhag sab ang mga tagtungod nga ipabalhin ang mga bukog sa dili pa mahuman ning buwana.
Niadtong Biyernes gipahibawo ni Mayor Michael Rama nga himuong park ang maong sam-ang apan wala’y labot ang pagpaguba sa Osmeña mausoleum.
Usa ka Rudy Sapio nipadayag nga dili na lang unta hilabtan sa syudad ang lugar sanglit maayo na ang pagkahiluna sa mga tawo ug sa mga patay.
Matud ni Rosita Lumbre nga 60 na katuig nagpuyo sa maong dapit nga mosugot siya nga himuon nga park kun maseguro sa mayor nga aduna sila’y maayong kabalhinan ug dili sa bukid.
Apan si Rama miingon nga dugay na ang plano alang sa maong lugar ug gani duna nay deed of exchange nga nagpamatuod nga gipanag-iya sa dakbayan ang maong dapit. (BANAT NEWS)