17-anyos nagmotorsiklo nabangga patay
CEBU, Philippines – Patay ang 17-anyos nga lalaki nga nagmaneho og motorsiklo human nabangga sa punoan sa gemilina sa barangay Biasong, Pilar, isla sa Camotes samtang angol ang duha ka backriders.
Ang namatay naila nga si Joey Becalas samtang naangol sila si Joemar Recorte, 19 ug Poldito Carloman, 22, pareho nga nagpuyo sa maong lugar.
Sigun pa ni PO3 Al Garciano sa Pilar Police nga nahinabi sa Banat News nga naabot sa lugar ang mga biktima sa dihang gusto unta sila nga motan-aw og duwa sa basketball niadtong Martes sa gabii.
Apan sumala pa nga wala nadayon ang duwa hinungdan nga nag-inom na lang kini ug dayon nanguli.
Matud sa mga backriders nga kusog ang ilang dagan ug pag-abot sa kurbadahon ug dulhogon nga bahin sa karsada, nawad-an og kontrol sa motorsiklo si Becalas ug mibangga sa gemilina.
Halos tag-tulo ka metros ang gilay-on sa nalabayan sa duha ka backriders apan si Becales ang naipit sa motorsiklo ug napasok sa kahoy hinungdan sa iyang kamatayon. – /GMR) (BANAT NEWS)
- Latest
