CEBU, Philippines - Natusak sa bala ang lawas sa usa ka 42- anyos nga lalaki human wala lung-i sa wala mailhing lalaki diha sa Sitio Lawis, Barangay Luray Dos dakbayan sa Toledo kagahapon sa buntag.
Ang biktima mao si Nilo Gako , taga lungsod sa Consolacion apan kasamtangang nagpuyo sa maong dapit.
Sumala pa ni Supt. Ricky Delilis, hepe sa kapulisan sa Toledo nga nagkaon ang biktima sa usa ka kan-anan sa maong dapit dihang kalit kining mibarog ug midagan pagkakita sa usa ka lalaking padung kaniya.
Giingong gipusil siya niini apan nakadagan ug nakalusot sa usa ka gamay nga agianan ang biktima apan wala kini lung-i og gukod hangtud nga misulod og usa ka balay si Gako nga gipanag-iya sa usa ka Alejandro Marinay.
Apan didto na hinuon siya na-corner ug gitusaktusak kini og bala. Wala hilabti sa killer ang tulo ka tawo nga nagpuyo sa balay.
Gidudahan ni Delilis nga drugas ang motibo sa maong pagpamusil tungod kay dunay usa ka gamay nga pakete nga gituohang shabu nga nakuha sa lawas sa biktima. Unom ka basiyo sa bala sa kalibre .45 ang nakuha sa crime scene. Ang kapuyo ni Gako nga si Alma Lapera way nahinumdomang kaaway ang biktima. (BANAT NEWS)