CEBU, Philippines – Patay na nga nakit-an ang usa ka mananagat nga naglutaw-lutaw sa dagat dapit sa Canjulao, dakbayan sa Lapu-Lapu niadtong Domingo sa hapon. Nailhan ang biktima nga si Daryl Quijano, 24-anyos, taga Purok Caimito sa maong barangay.
Usa ka Randy Berame, 40-anyos nga taga Purok Lubi ang nakakita sa patay’ng lawas sa biktima.
Ang inahan sa biktima nagkanayon nga nananghid nga mangisda samtang nagdala og pukot ang iyang anak niadtong Domingo.
Samtang patay usab ang 14-anyos nga lalaki human misawom sa dagat apan giingong dili kahibawong molangoy sa Pebbles Beach Resort, Liloan, Santander niadtong Lunes sa buntag. Ang nalumos naila nga si Marion Jay Perocillo, lumad nga taga lungsod sa Sibonga.
Pasado alas 8 sa buntag nangaligo sa dagat si Perocillo kauban ang iyang mga paryente ug kalit lang nahanaw dihang misawom sa dagat. Inabagan sa Marine Village Divers sa maong lugar, nakit-an ang lawas ni Perocillo sa may 50 metros gikan sa iyang gisawman ug halos 35 metros ang gilawmon sa dagat.
Sa laing bahin, patay’ng lawas nga gituohang nalumos ang napalgan nga nasangit sa naanod nga mga gapnod sa Butuanon River sa sitio Upper Tingub, dakbayan sa Mandaue kagahapon sa buntag.
Gituohang gikan sa ibabaw nga bahin sa barangay Talamban, dakbayan sa Sugbo ug gianod sa maong lugar ang biktima.
Gihulagway nga tambukon ang lawas sa lalaki, nagsul-ob og purol nga maong, adunay bungot ug tag-as ang buhok ug 5’ 5” ang gitas-on. Ang Scene of the Crime Operatives (SOCO) wala’y nakitang timailhan nga gituyo sa pagpatay tungod kay wala’y samad dinunggaban o samad pinusilan ang biktima. – /GMR) (BANAT NEWS)