CEBU, Philippines – Giawhag sa Bureau of Fisheries and Aquatic Resources-7 ang mga nanagat sa rehiyon nga magparehistro aron makapahimus sa mga benepisyo.
Kini atol sa pagbukas sa ika-51 Fish Conservation Week sa BFAR-7 kagahapon.
Ang kalihukan gibuksan pinaagi sa parade sa sayong buntag ug gisunod dayon ang Hataw diin ang tanang empleyado sa BFAR misalmot sa tiningub nga ehersisyo.
Ang tema sa selebrasyon karong tuiga mao ang “Sektor ng mga mangingisdang rehistrado at kinilala, kabalikat sa pagsulong sa pangisdaang masagana.”
Subay sa tema, si BFAR-7 Assistant Regional Director, Dr. Allan Poquita, nanawagan sa mga fisherfolks nga magparehistro sa ilang lungsod aron makapahimulos sa death benefits ug health insurance.
Gipasabot ni Poquita nga mamahimong makaapil sa pagpalista ang mga manginhasay, mga mamaligyaay og isda, mag-uuma nga nagnegosyo og isda ug mga mananagat. – /GMR) (BANAT NEWS)