CEBU, Philippines - Napusilan sa kapolisan sa Medellin ang usa ka lalaki nga misukol kanila samtang nasikop ang kauban nga nalakip sa ilang watchlist sa buy-bust operation pasado alas 11 sa miaging buntag sa barangay Antipolo.
Ang nasikop naila nga si Erlindo Booc, 35, ug ang napusilan mao si Rodelio Rustia, 27, mga molupyo sa maong lugar.
Si Senior Police Officer 3 Rolan Reyes, desk officer, nga nahinabi sa Banat News miingon nga nagpahigayon sila og buy-bust operation nga gipangulohan sa ilang hepe nga si Senior Inspector Christopher Ras Fernandez.
Sakay sa ambulansya ang mga polis aron dili makabantay ang suspek sa ilang presensiya.
Dihang dakpon na unta sa mga polis si Booc, ang iyang ig-agaw nga si Rustia mikuha sa iyang Ingram ug mition niini sa mga polis nga buot mudakop kanila.
Apan nakit-an siya ni Fernandez hinungdan nga gipusil sa dughan ug natumba.
Matud pa ni Reyes nga kun dili pa ambulansiya ang gigamit hayan nakabantay na ang mga suspek. (BANAT NEWS)