Gibiyaan sa asawa naghikog

CEBU, Philippines -  Lalaki nga gibiyaan sa asawa naghikog sa dakbayan sa Naga.

Ang napalgang patay naila nga si Neil Ocampo, 29, molupyo sa barangay Tinaan sa dakbayan sa Naga.

Base sa imbestigasyon sa kapolisan nga si Ocampo, nakit-an na lang nga nagbitay sulod sa iyang lawak ug may pisi sa iyang liog nga gihikot sa ibabaw sa iyang higdaanan.

Dihang nakabantay ang iyang igsuon nga si Carlo, dali niyang giputol ang pisi ug gidala kini sa Minglanilla District Hospital apan gideklarar na kini nga dead on arrival.

Nasuta sa imbestigasyon nga dunay problema sa pamilya si Ocampo kay gibiyaan kini sa iyang asawa.

Samtang sa laing bahin, pasado alas 6:00 kagahapon sa buntag napalgan sa usa ka food vendor ang usa ka lalaki nga puya sa barangay Bulacao sa dakbayan sa Sugbo. Base sa imbestigasyon sa Homicide Section sa Cebu City Police Office,  padulong na unta molabay sa iyang hugaw si Roberto Ancero, 34, dihang nakabantay kini sa usa ka puya sa kasagbotan.

Dali niyang gipahibalo ang Pardo Police Station nga dali pod nga mitawag sa Homicide Section. Ang puya gidala sa St. Francis Funeral Homes ug giimbestigar pa nila kung kinsa maoy responsable sa paglabay sa maong puya.  (BANAT NEWS)