Kapin P300 mil nasakiyo sa mga kawatan

CEBU, Philippines -  Kapin sa P300 mil ang kantidad sa mga gamit ug salapi nga nasakiyo sa mga kawatan nga miatake sa managlahing lugar sa dakbayan sa Sugbo.

Pasado alas 4:00 sa miaging adlaw mireport sa kapolisan si Gino Luigi Do, 26, molupyo sa usa ka village sa dakbayan sa Talisay.

Matud niya tulo ka mga lalaki ang misulod sa iyang balay pasado alas 10:00 niadtong Huwebes ug gikuha iyang relo, Iphone 5, pearl earrings ug laptop. Nailhan niya ang usa sa mga suspek ug  gipangita na karon sa kapolisan.

Samtang kapin sa P200 mil nga cash ug mga mahalong  gamit ang gikawat sa mga kawatan gikan sa balay sa negosyanteng si Esterlita Baricuatro,38,  sa Barangay Langtad sa dakbayan sa Naga.

 Matud pa sa biktima nga gibutang niya ang P140 mil nga cash sa iyang bag sa wala pa siya matulog apan sa pagkabuntag nahanaw na kini lakip na ang laptop.

Ang maong salapi kinitaan sa ilang tindahan ug auto shop.Base sa imbestigasyon nga ang mga kawatan mikatkat sa kisame nga padayon pang gihuman.  Nakakuha og finger prints ang kapolisan sa sala sa biktima ug maoy gamiton sa nagpadayong imbestigasyon. (BANAT NEWS)