CEBU, Philippines - Duha ang patay ug usa ang gidala sa tambalanan human sa panagbangga sa motorsiklo ug Starex van sa National Road, Looc Poblacion, Liloan, Cebu, kagahapon sa kaadlawon.
Dead on the spot sila si Wilson Deiparine, drayber sa motorsiklo ug Jomar Sugarol samtang nalandig sa tambalanan si Randy Manzano nga pulos taga lungsod sa Liloan.
Samtang ang nagmaneho sa Starex van nga si Taejin Lim, Korean National, taga siyudad sa Danao.
Matud pa ni Police Officer Three Jason Gayo sa Liloan Police Station nga nahinabi sa Banat News mitug-an nga subay sa managlahing direksyon ang duha ka sakyanan ug sa dihang misulay og overtake ang van sa lain nga sakyanan wala niini mabantayi ang motorsiklo nga iyang nakasugat nga gisakyan sa tulo ka mga batan-on ug maayong pagkasampak sa duha.
Tungod sa kakusog sa bangga patay diha- diha dayon ang duha ka biktima samtang dali nga gidala sa Vicente Sotto Memorial Medical Center si Manzano ug dali sab nga gibalhin sa usa sa mga pribadong tambalanan dinhi sa Sugbo.
Gikan sa barangay Cutcot ang mga biktima nga paingon na unta nga mopauli sa Liloan, samtang ang langyaw ang paingon na ‘sab unta nga mouli sa dakbayan sa Danao.
Ang langyaw nga nahinabi ni Gayo mibutyag nga wala kini makabantay sa motorsiklo tungod kay wala kini suga.
Sumala pa ni Gayo nga hangtud karon wala pay pamilya sa biktima ang mipakita sa iyang buhatan aron mopasaka og kaso. (BANAT NEWS)