CEBU, Philippines – Usa ka sunog ang miulbo sa dakbayan sa Sugbo kagahapon sayo sa buntag ug gilamoy ang usa ka building nga giokupar og duha ka mga establisemento. Mga nag-check in naglumbaanay’g panglayat sa bintana aron maluwas. Ang Sandingan Lodge nga duna’y 28 ka mga lawak ug ang Metro Appliance Centrum Plaza Incorporated nga nahimutang sa eskina sa Osmeña Boulevard ug Sancianko Street ang gikaon sa maong sunog nga gibanabanang mokabat P200 mil ang danyos.
Hinuon walay gikatahong naangol sa maong hitabo nga nadawat sa kabomberohan alas 4:37 sa buntag ug gideklarar nga under control paglabay sa 25- minutos.
Sumala pa ni Fire Investigator Daniel Relatado nagsugod ang sunog sa bodega nga bahin sa appliance store nga gipanag-iya ni Anita Woo. Si Woo dali nga miabot sa maong lugar apan wala kini mohatag og mga pamahayag ma’y labot sa sunog. Nasayran nga ang maong appliance store nahimutang sa ground floor ug ang lodge nahimutang sab sa ikaduha ug ikatulo nga andana.
Usa sa mga nag-abang sa maong lodge nga si Nicario Espinosa nga gikan pa sa Tacloban City nagkanayon nga nahurot og kasunog ang tanan niya nga importante nga dokumento, diin kini unta nag proseso sa “burial benefits” sa iyang inahan sa SSS.
Matud niya samtang siya natulog nakabantay kini nga nagdilaab na ang tapad niya nga kwarto maong dali siya nga midagan pagawas ug wala siyay nadala nga butang.
Ang imbestigador sa BFP nga si Relatado miingon nga ginama sa kahoy ang maong lodge mao nga dali kaayo nga mikatay ang kalayo.
Usa ka alyas Jill nga usa ka “commercial sex worker” ang miangkon nga naputol ang ilang gibuhat sa usa niya ka kostumer diha sa usa ka lawak sa maong lodge tungod sa pag-ulbo sa kalayo. -/EIM) (BANAT NEWS)